Главная
19-октябрь — Кыргыз Республикасынын Социалдык коргоо жана кесиптик бирликтер кызматкерлеринин күнүнө карата Ош мамлекеттик университетинде салтанаттуу иш-чара уюштурулду. Иш-чаранын негизги максаты — университеттин өнүгүшүнө салым кошуп, үзүрлүү эмгеги менен айырмаланган кызматкерлерге ыраазычылык билдирүү жана алардын эмгегин баалоо болду.
Салтанаттуу аземди ОшМУнун кесиптик бирлик комитетинин төрагасы А.Э. Саттаров ачып берди. Ал өз сөзүндө социалдык коргоо жана кесиптик бирлик кызматкерлеринин коомдогу ордуна токтолду. Ошондой эле билим берүү тармагында эмгектенген кызматкерлердин ишмердүүлүгү университеттин өнүгүүсүндө өзгөчө мааниге ээ экенин белгиледи.
Иш-чаранын жүрүшүндө университеттин билим берүү, илим жана коомдук иштеринин өнүгүшүнө салым кошкон кызматкерлердин эмгеги белгиленди. Жалпысынан 50дөн ашуун профессордук-окутуучулук курамдын өкүлдөрү ар кандай сыйлыктарга ээ болушту. Сыйлоо аземи кызматкерлердин көп жылдык үзүрлүү эмгегин баалоого жана алардын кесиптик жетишкендиктерин даңазалоого багытталды.
Сыйлык ээлерине ак ниет эмгеги, жогорку жоопкерчилиги жана университеттин өнүгүүсүнө кошкон салымы үчүн ыраазычылык билдирилди. Мындай иш-чаралар эмгек жамаатындагы ынтымакты бекемдеп, кызматкерлердин кесиптик ишмердүүлүгүнө дем-күч берет. Ошондой эле жаш муундарга үлгү болгон тажрыйбалуу адистердин эмгегин даңазалоого шарт түзөт.
Салтанаттын көркүн маданий программа толуктады. Иш-чаранын катышуучуларына жагымдуу маанай тартуулаган ырлар жаңырып, бийлер тартууланды. Музыкалык жана бий номерлери майрамдык маанайды арттырып, аземге өзгөчө шаң кошту.
Ош мамлекеттик университетинде өткөрүлгөн бул иш-чара кызматкерлердин эмгегин урматтоонун жана алардын коомдогу маанисин белгилөөнүн жаркын үлгүсү болду. Майрамдык азем катышуучуларга жакшы маанай тартуулап, кесиптик бирликтин ишмердүүлүгүнүн маанилүүлүгүн дагы бир жолу айгинеледи.
191 
03:15 20-10-2026
